Sa publitzidade online, mutida fintzas web marketing, impreat internèt pro indiritzare messàgios de marketing promotzionale a is consumadores.
Generalmente, in s’internèt marketing is protagonistas funt duos: s’editore chi intrega sa publitzidade in is cuntenutos on-line suos (a esèmpiu giornales online o giassos de spàssiu) e un’insertzionista, chi frunit is annùntzios de amustrare.
S’istrategia a sa base de unu progetu de web marketing est su chircare de otènnere a su giassu (o a su produtu patrotzionadu) sa prus visibilidade in unu pùblicu bene definidu, siat in is pàginas de is resurtados de is motores de chirca chi in is pàginas de cuntenutu de giassos o retzas sotziales.
Sas fainas chi torrant in su web marketing funt medas e semper in evolutzione; inoe, cussas prus consolidadas:
• SEO
dae s’inglesu ‘Search Engine Optimization’, cumprendet totu cussas fainas furriadas a megiorare sa visibilidade de unu giassu web in is motores de chirca cun sa punna de megiorare (o mantènnere) sa posidura in is pàginas de arresurtadu;
• DEM
dae s’inglesu ‘Direct Email Marketing’, est unu tipu de marketing deretu, chi impreat sa posta eletrònica cumente a mèdiu pro comunicare messàgios, cumertziales e no, a su pùblicu.
S’impreat custu tèrmine pro si referire a s’imbiu de messàgios email pro achirire clientes noos, mantènnere is chi giae bi funt, o cumbidare a comporare carchi cosa.
• PPC
dae s’inglesu ‘Pay Per Click’, est una modalidade de còmpora e de pagu de sa publitzidade online; s’insertzionista pagat in proportzione a is incracadas, est a nàrrere sceti candu un’impitadore incracat in s’annùntziu publitzitàriu.
Un’esèmpiu de publitzidade pay per click est su keyword advertising, est a nàrrere annùntzios patrotzinados chi cumparint in mesu de is arresurtados de is motores de chirca.
• AFFILIATE MARKETING
est unu sistema publitzitàriu paressidu a su Pay Per Click chi pagat de is annuntziantes segundu a is còmporas o àteras atziones chi ant fatu is impitadores.
Respetu a sa publitzidade veiculada in is mèdias traditzionales (ràdios, tv, istampa, etc.), s’online advertising tenet tres avantàgios fundamentales:
· permitit de cuncordare comunicatziones miradas segundu de su pùblicu de riferimentu;
· permitit generalmente de pagare sceti a sa lòmpida de arresurtados;
· si podit controllare e amesurare de manera costante.
Pro custa resone assumet un’ importu mannu s’analìtica, est a nàrrere s’amenta de is trastos de arregorta, compudu e anàlisi de totu is datos de su tràficu in su pròpiu giassu web e de is campagnas promotzionales.
